अक्कलकोट तालुक्यातील डोंबरजवळगे ग्रामपंचायतीसाठी दुरंगी लढत
। चपळगांव : प्रतिनिधी
अक्कलकोट तालुक्यातील डोंबरजवळगे ग्रामपंचायत निवडणुकीत श्री महालक्ष्मी शेतकरी शेतमजूर कामगार आघाडी आणि श्री महालक्ष्मी महाविकास आघाडी यांच्यात दुरंगी लढत होत आहे. डोंबरजवळगे ग्रामपंचायत निवडणुकीत तीन वॉर्डातून उमेदवार निवडून द्यायचे आहेत. पंधराशे मतदार या उमेदवारांचे भवितव्य ठरवणार आहेत.
श्री महालक्ष्मी शेतकरी शेतमजूर कामगार आघाडीच्या गौराबाई उदगिरे, दीपाली गायकवाड व गीतांजली नारायणकर या तीन उमेदवारांची बिनविरोध निवड करण्यात आली आहे. तर इतर सहा जागांसाठी निवडणूक होत आहे. श्री महालक्ष्मी शेतकरी शेतमजूर कामगार आघाडीचे उमेदवार वॉर्ड क्रमांक एकमधून चिदानंद माळगे, दीपाली सुलगडले, श्रीदेवी सवळे हे उभे आहेत. वॉर्ड क्रमांक दोन मधून रुक्मिणी माशाळकर, नागनाथ भोळे तर वॉर्ड क्रमांक तीनमधून शिवलाल नारायणकर निवडणूक लढवत आहेत. तर यांच्या विरोधात श्री महालक्ष्मी महाविकास आघाडीचे उमेदवार वॉर्ड क्रमांक एकमधून शीतल चिवरे, विरेश्री सुलगडले, दाऊद मकानदार हे उभे आहेत.
वॉर्ड क्रमांक दोनमधून रतन शिंदे, हसीना फकीर तर वॉर्ड क्रमांक तीनमधून आरपीआय आठवले गटाचे उमेदवार संदीप गायकवाड हे निवडणूक रिंगणात उतरले असून ते श्री महालक्ष्मी महाविकास आघाडीकडून लढवत आहेत. डोंबरजवळगे येथील महात्मा गांधी तंटामुक्त समितीचे अध्यक्ष गजानन जकिकोरे आणि सुनंदा चितळे हे वॉर्ड क्रमांक दोन मधून अपक्ष उमेदवार म्हणून नशीब अजमावत आहेत आणि वॉर्ड क्रमांक तीनमधून उत्तम गायकवाड हे अपक्ष उमेदवार मैदानात उतरले आहेत.
डोंबरजवळगे ग्रामपंचायत निवडणूक बिनविरोध करण्यासाठी सर्वपक्षीय नेत्यांनी प्रयत्न केले. ग्रामस्थांची बैठक घेण्यात आली. मात्र एकमत झाले नाही. त्यामुळे सध्या दोन्ही गटांतील उमेदवारांनी जोरदार प्रचार सुरू केला आहे तर अपक्ष उमेदवार आपल्या वॉर्डातील मतदारांच्या गाठीभेटी घेत आहेत. दोन्ही गटांतील प्रमुख नेते मतदारांना आपल्या गटातील उमेदवारांना मतदान करण्याचे आवाहन करत आहेत. तर अपक्ष उमेदवार गावचा विकास करण्यासाठी युवा उमेदवारांना संधी देण्याची गरज असल्याचे प्रचारात सांगत आहेत. दोन्ही गटांतील उमेदवार एकमेकांचे नातेवाइक आहेत. डोंबरजवळगे ग्रामपंचायत निवडणूक भाऊबंदकीमध्ये लढवली जात आहे.
गेल्यावेळी एकाच गटातून निवडणूक लढविलेले उमेदवार सध्या एकमेकांच्या विरोधात उभे राहिले आहेत. नातेवाइक दोन गटातून निवडणूक लढवत असून कोणत्या उमेदवाराला मतदान करायचे याची चिंता सग्यासोयर्‍या मतदारांना लागली आहे. डोंबरजवळगे ग्रामपंचायत निवडणुकीत युवकांचे मतदान निर्णायक ठरण्याची शक्यता आहे. गावातील अनेक मतदार परगावी असून सर्व उमेदवार त्यांच्या संपर्कात आहेत. डोंबरजवळगे ग्रामपंचायत निवडणुकीसाठी प्रचाराला चांगलाच वेग आला असून मतदार कोणाच्या बाजूने कौल देणार हे मात्र 18 जानेवारी रोजी मतमोजणी झाल्यानंतरच स्पष्ट होणार आहे.
About Author
